作品所在位置: 台中縣 大甲鎮 文體:傳說
  語言:閩南話
 

《劍井的故事》


咱來講這个鐵山,這个鄭成功,這个劍井。實在鄭成功成實有來鐵山?無啦!實在無啦!

鄭成功是對水路來的啦!啊伊這支軍是對佗位來,是對五甲來的你知無?大安五甲。伊鄭國姓這个兵馬,伊分做幾个路。鄭成功,因為鄭成功就是扶福王才走來金門,金門清兵得咧,才擱走的呢!啊無伊按算金門就想卜做「不不死國啊呢!講,我來走到不死國,我就死啊!啊走來到金門擱人抄,姑不將才擱來到台灣。

來台灣,毋過安平彼个所在才有開發,彼是荷蘭佔,彼有一个「億載金城」,呼,彼个是荷蘭佔的,所以鄭國姓卜拍彼个uan5 a2是有困難。

鐵砧山這个古蹟,實在是伊對五甲來,較早林聰明彼塊厝,彼號做番社仔,今也頂店隔壁彼个番社仔庄,有郭金柱彼塊,彼塊hiong9的彼有低厝仔的西洋樓,彼塊,林聰明阿公死,林聰明起的,才賣郭金柱呼!彼陣號做番社仔,就是今也的江南里。

彼个時陣大甲攏總無漢民,鄭國姓來的時,大甲無漢民,干仔有番仔無漢民,咱講平埔番。呼!彼擱是番社仔,咱頂店彼个番社仔,實在是番仔得住的番社仔,番仔寮古早是uan5 a2番仔得住的,才會叫做番仔寮,彼就是安呢來的呼!

鄭國姓兵馬來,彼个番仔看著,毋捌看著人,著無?較看攏的仝族的哩。猶擱鄭國姓的兵馬來看著爾,伊就共伊啊,定著輸伊啊,就走去鐵砧山頂,予伊直直抄、直直抄uan5 a2……。

番仔干仔走予逐爾。哇!番仔走到鐵砧山頂,伊這一个坑溝仔,啊這攏山,啊鄭國姓的兵馬直直共抄,抄到「劍井」彼,彼个番仔煞無看,啊無看卜擱落來。夭壽啊!面頂彼的石頭啦,柴箍啦,安呢直直落來。

伊講啊:「安呢使啊!安呢卜安怎?呼!無,安呢,當,ieng9卜佇遮過暝,抑無,暗啊呢。亦無水啊,就逐个水啊!」鐵砧山頂是有水,鐵砧山頂毋是干仔劍井才有水哩啊!鐵砧山頂彼个有泉水的所在,十外位呢!遮的逐个麼愛認清楚的,毋是講鄭國姓安呢落eh4祝天呼,啊彼劍插落水才流起來,彼攏是加講的。

鄭國姓猶未來的時,鐵砧山頂已經有人得種作啊,有泉水得種作啊,所以彼講:「啊,當ieng9暗住遮無水卜安怎?」來尋啊,尋啊尋啊,哦,安呢彼泉水bok4 bok4 bok4,遮就有澹溼啊,才安怎呢,共伊看覓,水就直直清起來,原因是安呢來的。

啊番是較啊,彼戇番戇番啊。嗯,佇彼看您就無來,無來就走啊!著無?啊走了後,鄭國姓的兵馬一下看,無人,好,嗯!

毋才會佇拍番彼个當中,一部分共逐去,一部分彼个營才來佇「營盤口」,彼就,營盤口就是安呢來。營紮佇彼,彼號做營盤口,社尾擱來彼號做營盤口,啥物人的營盤?鄭國姓的營盤。啊有的是干仔安呢聽予過。

鄭國姓是對五甲起水,彼毋是鄭國姓本身,因為伊亦有水路,亦有分陸路,陸路是對五甲起來,伊的兵馬講分真散安呢,鄭國姓的兵馬uan5 a2分真散,北部麼有呢!uan5 a2是行路落來,伊是uan5 a2卜到彼的目的地逐个才卜集合的。
劍井的故事
標題為采錄者暫擬。
音kam2,難道。
成實
音ciann5 sit8,真的。
佗位
音to2 ui7,哪裡。
音jiok4,追趕。
音bue7,不會。
音tua3,住。
音ti7,在。
想卜
音siunn7 beh4,想要。
不死國
音put4 su2 kok4
音hoo7,給、被。
姑不將
不得已。
音nia9,“na7 nia7”的連音。
uan5 a2
仍然。
hiong9
彼種(hit4 ciong2)的連音。
干仔
音kan1 a1,只有。
音ma7,也。
毋捌
音m7 pat4,不曾。
音hut4,打。
定著
音tiann7 tioh8
音peing5,邊。
音cia1,這裡。
音phiann1,丟掉。
使
音bue7 sai2,不行。
ieng9
晚上,“ieng9”是下昏(e7 hng1)的連音。
音che7,找。
澹溼
音tam5 sip4,溼。
音pueh4,用手撥。
看覓
音khuann3 mai7,看看。
音gong7,儍。
音cat4


●資料出處:參見《台中縣民間文學集18--大甲鎮閩南語故事集(一)》頁80-87