佇民國差不多我做國民學校六年的時呼，差不多佇咧民國五十幾年遐有一遍呼，半屏山呼，崩去—崩去就是攄落來啦—抵仔邊仔彼陣有一間水泥廠叫「東南水泥廠」啊，伊彼歸个cong9仔 落來，來到伊的牆仔邊啊。彼陣有的走無離的呼，伊若有人佇咧牆仔邊呼，予彼土掩死的啦。彼號火車一台走到遐的時，伊若予伊蓋著，捒邊仔去就著啦。伊彼若像彼［土石流］安呢呼，啊伊cong9仔捒起來。我做國民學校的時有走去看麼。就對頂懸攄落來，歸 山cong9仔攄落來。彼號伊麼是有一个故事的啦。
永過安怎呢？佇較早聽您阿媽 得講呼，的祖先呼，較早的風水捌葬佇彼號半屏山腳遐。彼就遐有二丸、遐有一粒彼號石公，一粒石婆啊。若卜行過去掃墓的時呼，遐有二丸石頭安呢直直像人安呢啦，足大丸的石頭直直安呢啦。一粒較細粒的，攏共號做彼叫做「石公」啦；這號這粒較細粒的號「石婆」啦。若去到遐共喝：「石公！」伊今也就有［回音］啦，［回音］：「石公！」安呢就著啦。彼號今也毋知猶有無，俺是毋知影，這著愛去、因為彼然後攏管制呀麼，今煉油的廠攏無當起li0啊，遐有人得顧麼，得 山麼。
彼我今也是講，伊彼搭遐較早伊麼是一个地理人破壞去啊。較早會記我佇e0國校的時捌聽著講，這粒半屏山頂呼，較早是日本時代麼有人挖磅埪佇hin1內底啦，但是遐有一隻彼號足大隻彼千年的蛇呼，佇遐得修行啦。彼號因為伊到每暗的時呼，黃昏的時攏看佇彼號彼，因為彼歸粒彼陣猶未開發的時，歸粒山攏樹木麼，遐有一个磅埪到尾仔毋知是攏會出煙啦，像人得焚火呼，煙筒的煙安呢就著啦，這就是佇內底得修行啦。
彼號以陣的，向彼號西爿彼二爿遐是攏海軍陸戰隊佇遐得住麼。彼號遐海軍陸戰隊的遐攏有人得企衛兵啊，若每暗攏看著彼有得出煙呼，cong9仔共報告連長啦。啊連長若歸連的人去共觀察，講：「呔會攏安呢啊？」彼个就掠無彼號啊，cong9仔用彼个大炮呼，啊炸藥cong9仔落去共炸，炸彼个洞，啊彼就深gah8，啊無人敢落去，啊毋知影內底有啥物件。
彼就是無愛人看著呼，永過較山腳捌種稻仔，捌看著下載時巡田園豈會歸个彼稻仔攏安呢，雙爿的稻仔攏安呢，攏倒落去啊。彼就是彼隻蛇精捌落來巡過就著啦，捌落來安呢趖過，定定久久仔會趖過就著啊。
到伊然後海軍陸戰隊cong9仔用炸藥來炸彼个山，hoo2～cong9仔彼隻、cong9仔炸一下呼，炸足濟炸藥，彼隻蛇cong9仔予伊內底炸死麼。炸死當得卜去共發見，去共掠出來的時呼，二十幾个人呼，將彼隻蛇共扛落來。扛落來的時，因為彼做兵仔永過彼較早的老兵呼，攏住佇彼下腳，攏的宿舍麼，就［撤退］來，彼陣永過若像咱今的老榮民遐的老兵仔，人叫「老芋仔」彼就著啦，彼攏共刣啊，斬轉去食。彼號頻食著伊蛇肉的人呼，逐間厝攏燒去啊，無食著攏無燒去，變無代無誌攏火燒去啊。就是彼隻蛇精予刣死了後的時呼，無偌久就cong9仔變、彼隻蛇人聽得講，是遐彼粒山的［守護神］啦，佇遐得鎮守e0就著啦，佇遐得保護彼粒山的。 |
cong9仔 「將安呢（ciong1 an2 ne1）」的連讀，就這樣。 ［土石流］ 用此［ ］符號標示者，表講述者此處用普通話發音。 挖磅埪 音oo2 pong7 khang1，挖山洞。 啥物件 音sann2 mih8 kiann7，什麼東西。 無代無誌 音bo5 tai7 bo5 ci3，無緣無故。 |